شو اللي صار بمظاهرة انهاء الانقسام في عمان ,,,,بالصور

يوم الثلاثاء الماضي مش بس كنت مبسوط كان ممكن اطير من الفرحة _ على الرغم من وزني الزائد _ فانا اخيرا قادر على ان اكون مدونا يجناحين _ قصدي الكتابة والتصوير _ لاني خلص وبعد ان عصرت جيوبي , وطلعت عيوني وانا بشتغل لحتى حوشت حق كاميرا كوداك  12 ميجا بيكسل وما شالله عليها , ويوم الثلاثاء الماضي زي ما الكل بعرف او ما بعرف كان يوم انهاء الانقسام الفلسطيني وطبعا طول ما انا بالشغل والاحلام بتراودني اني اخدلي اكمن صورة محرزة وطبعا الاشي الاهم انو المظاهرة تكون ناجحة عشان ننهي هالسفالة اللي صايرة بالبلد واللي اسمها انقسام , طبعا  احلامي بمظاهرة ناجحة ما كانت مبنية على اوهام لاني بعرف كويس انو الاردن هو مكان اكبر تجمع للاجئين الفلسطينيين في العالم , ولاني فكرت انو الاردنيين والفلسطينيين تغيروا بعد 25 يناير _ ثورة مصر_ وبعد البوعزيزي رحمة الله عليه . 
وما في داعي احكي كم خاب املي من لما وصلت 
بمجرد ما نزلت من التكسي اللي دفعلته  دينار وثلاثين قرش _ عداَ ونقدا _ حتى فوجئت بالعدد  الهائل من البشر اللي كانوا قدام السفارة ,,,, همي نفسه العشرة او العشرين انسان اللي مافي مظاهرة في البلد الا وهمي اللي بهتفوا فيها , وما في مظاهرة الا وهمي اللي داعينلها 
قلت لحالي يا ولد انت سوي اللي عليك وحاول انك تتجاوز مسالة العدد الموجود حاليا هون والخير بالجايات و يا ولد غطي الايجابيات وصور اللافتات والاعلام الفلسطينية الرائعة وسلامة تسلمك 
وفعلا طلعت الكاميرا اللي حكتلكم عنها وتجرات لاول مرة اني اصور بس كنت وانا بصور سواءا فيديو او 
photo
بلاحظ اللي بسير حولي  ,من الاشياء اللي لاحظتها انو المشاركين "الثلاثين او الخمسين" على ابعد تقدير كانوا ينقسمون الى ثلاثة اقسام 
فئة كانت جاي فعليا عشان رغبتها العارمة في انهاء الانقسام , فئة محروق دمها وجدا على بلدها , فئة  من الناس اللي قلبها ابيض وما وسختو السياسة القذرة 
وفئة اخرى _ بفتح الهمزة او ضمها _جاي بس , وصدقوني لما بحكي بس , عشان تزبط بنات , اه يا جماعة في بمجتمعنا مريضين الى هذا الدرجة , وفي عنا كبت عاطفي وجنسي  _ على الرغم من نفي الاسلاميين لهذا الشيء_وفي عنا ناس مستعدة تستغل دم الف شهيد زي محمد الدرة وفارس عودة بس عشان تروح  عالبيت ومعها رقم بنت , والافضل انها تكون بنت متحررة 
بس عزائي الوحيد انها فئة قليلة , او يا رب تكون قليلة 
والفئة الثالثة من المتظاهرين كانت من الشباب الفصائلي , وهمي درجات في تعصبهم لفصيلهم , ففي ناس اجت بس لتحكي انو احنا كفصيل كنا موجودين , وفي ناس اجت لأنها محروقة على الدم الفلسطيني , وفي ناس اجت لتجير الحدث لقائد الفصيل واللي ما شالله عليه شو وطني وشو زلمة جدع وشو انو ابن حلال وهو الحل 
ملاحظة : قبل شوية اسابيع وبالتحديد في يوم تنحي الفرعون المصري  كان في عشرات الالاف في هذا المكان بحتفلوا بسقوط الطاغية السؤال اللي بطرح نفسه : وين احتفوا ؟؟؟ 
اسألوا لبيبة 
ملاحظة ايجابية : من الايجابيات النادرة في التظاهرة انو ما تم  رفع اي علم فصيل فلسطيني 
وبعد ما "ملقت" القصة وظهر انو راح يسير انقسام في المظاهرة اكبر من الانقسام اللي حاصل في الوطن المحتل فضلت انسحب واروح احضر الفيلم الصربي اللي انعرض في مؤسسة عبد الحميد شومان 
وانها لثورة حتى مش عارف شو